ஹிட் தி தேர்ட் கேஸ் – திரை விமர்சனம்

கொலை வழக்கு ஒன்றை விசாரிக்கும் காவல்துறை எஸ். பி. நானிக்கு, ஒரே பாணியில் காஷ்மீர் உள்பட நாட்டின் பல்வேறு பகுதிகளில் 13 பேர் கொடூரமாக கொலை செய்யப்பட்டிருக்கும் தகவல் கிடைக்க அந்த வழக்குகள் பற்றி விசாரிக்கும் சிறப்பு அதிகாரியாக காஷ்மீர் பயணப்படுகிறார்.

அங்கே விசாரணை தொடங்கிய போது தான் இதற்கென கொடூர கறு ப்பு உலகம் ஒன்று இருப்பது தெரிய வருகிறது. அந்த கறுப்பு உலக மனிதர்கள் யார்? எதற்காக இப்படி கொடூர கொலைகளை செய்து வருகிறார்கள்? இந்தக் கேள்வி,விடை இல்லாமல் கேள்வியாகவே நிற்க…இதை கண்டுபிடிக்க வேண்டுமானால் அந்த கொடூர உலக மனிதர்கள் கூட்டத்தில் சேர வேண்டும். அப்போதுதான் அவர்கள் நோக்கம் தெரிய வரும்.ஆனால் அங்கே சேர்வது அத்தனை எளிதில்லை. மாட்டிக் கொண்டால் அப்போதே கொடூர மரணம் நிச்சயம்.
இது தெரிந்தும் உயிரை பணயம் வைத்து அவர்கள் நம்பிக்கை பெற்று அந்தக் கூட்டத்தில் ஒருவன் ஆகிறார் நானி.

ஒரு கட்டத்தில் நானி அவர்களை வேட்டையாட வந்த போலீஸ் அதிகாரி என்பது அந்த கொடூர கூட்டத்துக்கு தெரிய வர…இப்போது வலையில் சிக்கிய சிங்கம் போல் நானி. உயிர் தப்பினாரா? அல்லது அந்தக் கூட்டத்தை களை எடுத்தாரா? என்பதை ஆயுதங்களின் பாய்ச்சலோடு சொல்லி இருக்கும் படம்.

காக்கி சாட்டை போடாத காவல்துறை அதிகாரியாக நானி கம்பீரம் காட்டுகிறார். ஸ்ரீநிதி ஷெட்டியுடனான முதல் சந்திப்பில் நிஜமாகவே காதல் பொங்குகிறது. காதலியும் போலீஸ் தான் என்பதை பின்னாளில் தெரிந்து கொள்ளும்போது நானி முகத்தை பார்க்க வேண்டுமே, அடடா அடடா… சண்டைக்காட்சிகளில் வன்முறை அதிகம். ரத்தமும் அதிகம். நாயகியாக நடித்திருக்கும் ஸ்ரநிதி ஷெட்டி நானி யி டம் காதல் சொல்லும் இடம் கவிதை. துடிப்பான போலீஸ் அதிகாரியாக இன்னொரு முகமும் காட்டி ரசிக்க வைக்கிறார்

சூர்யா ஸ்ரீநிவாஸ், அதில் பாலா, ராவ் ரமேஷ், சமுத்திரகனி, கோமளி பிரசாத், மகந்தி ஸ்ரீநாத், ரவீந்திர விஜய், பிரதீக் பாபர், அமித் சர்மா கதையின் கிளை பாத்திரங்களில் வந்து ஜொலிக்கிறார்கள்.

ஒளிப்பதிவாளர் சானு ஜான் வர்கீஸ் கண்கள் திணற திணற காஷ்மீரின் அழகை கொட்டித் தந்திருக்கிறார். இசையமைப்பாளர் மிக்கி ஜே.மேயரின் பின்னணி இசை அதிரடிக்கேற்ற அதிரடி. எழுதி இயக்கியிருக்கும் சைலேஷ் கோலானு, கிரைம் சஸ்பென்ஸ் திரில்லர் ஜானரை, புதிய கதைக் களத்தில் சூடு குறையாமல் இயக்கி படத்தின் தலைப்பை உறுதி செய்திருக்கிறார்.
அதிரடி மேளா.