சுமோ – திரை விமர்சனம்

சிவா அலைச்சறுக்கு விளையாட்டில் ஆர்வம் கொண்டவர் அந்த விளையாட்டில் தன்னை மேம்படுத்திக் கொள்ள விரும்புபவர் சென்னை கடற்கரையோரம் உள்ள ஒரு ஹோட்டலில் வேலை பார்த்துக் கொண்டே அலைச்சறுக்கு விளையாட்டையும் தொடர்கிறார்.
இப்படி ஒரு நாள் அலைச்சறுக்கு விளையாட்டுக்காக கடற்கரை வருபவர் அங்கே கரையோரம் ஓங்குதாங்கான ஒருவர் மயக்க நிலையில் இருப்பதை காண்கிறார். அவரைக் கண் விழிக்க வைத்து தன் வீட்டுக்கு அழைத்து வருகிறார். பழசு எல்லாம் மறந்து போன அந்த நபரும் தற்போது குழந்தையின் மனநிலையில் இருக்கிறார்.
இந்நிலையில் கடற்கரையில் கண்டெடுக்கப்பட்டவர் ஜப்பானில் உள்ள பிரபல சுமோ
மல்யுத்த வீரர் என்பது தெரிய வர, சிவா அவரை அழைத்துக் கொண்டு ஜப்பான் போகிறார்.
அங்கே போன பிறகுதான் அந்த சுமோ மல்யுத்த வீரர் அவரது எதிரிகளால் நாடு கடத்தப்பட்டவர் என்பது தெரிய வர…
இதற்கிடையே மருத்துவ சிகிச்சை மூலம் சுமோ வீரர் மீண்டும் பழைய நிலைக்கு வர, எதிரிகளின் சூழ்ச்சிகளை தாண்டி அவரை சுமோ மல்யுத்த போட்டியில் பங்கேற்க வைக்கிறார் சிவா.

தடைகளை உடைத்து சுமோ போட்டியில் வென்றாரா என்பது கதை.
சுமோவின் நண்பனாக சிவா அந்த கேரக்டருக்கு பாந்தமாக பொருந்துகிறார் இவருக்கும் நாயகி பிரியா ஆனந்துக்குமான காதல் அழகான காதல் கவிதை.
நாயகியாக வரும் பிரியா ஆனந்த் கொஞ்ச காட்சிகளே வந்தாலும் மனதில் நிறைந்து போகிறார்.
சுமோவாக நடித்திருக்கும் யோஷினோரி தாஷிரோ முதல் பாதியில் அந்த அப்பாவித்தன முகத்தை வைத்துக்கொண்டு லாலிபாப் சாப்பிடுவது தனி அழகு. பிற்பகுதியில் சுமோ மல்யுத்த வீரராக களம் இறங்கும் காட்சிகளில் அந்த உடல் மொழியும் நடிப்பும் வேறு லெவல்.
போட்டி முடிந்ததும் மல்யுத்த மேடையில் சிவாவை அழைத்து நன்றி பாராட்டும் காட்சியில், ச்சும்மா அதிருதில்ல திரையரங்கம்.
சிவாவின் நண்பராக வரும் விடிவி கணேஷ் அவ்வப்போது சிரிக்க வைக்கிறார்.

பிரியா ஆனந்த் மீது திடீர் காதலாகி பெண் கேட்டு வரும் யோகி பாபு சிரிப்புக்கு பதில் கடுப்ஸ் ஏற்றுகிறார் நிழல்கள் ரவி, சேத்தன், சதீஷ் சுரேஷ் சக்ரவர்த்தி தங்கள் கேரக்டர்களுக்கு நடிப்பில் நியாயம் செய்கிறார்கள்.
நிவாஸ் கே பிரசன்னாவின் இசையில் பாடல்கள் தாளமிட வைக்கின்றன. ராஜீவ் மேனனின் கேமரா ஜப்பானை சுற்றி சுழன்றதில் கண்கள் பெற்றது அமுத விருந்து.
எஸ்.பி.ஹோசி மின் இயக்கியிருக்கிறார் சுமோ மல்யுத்த வீரரின் பின்னணியில் கதை நகர்ந்தாலும் , அந்த வீரருக்கான பின்னணி கதையில் இன்னும் கூடுதலான ஆழம் இருந்திருக்கலாம்.
என்றாலும் சுமோ சம்பந்தப்பட்ட காட்சிகள் குழந்தைகளின் கொண்டாட்டமாகி விடுகிறது.