சூர்யா-பாலா இணைந்த படத்தின் அடுத்த கட்ட படப்பிடிப்பு எப்போது?

இந்த வருடத்தில் அதிகம் எதிர்பார்க்கப்படும் படமாக எதிர்பார்ப்பை விதைத்திருக்கிறது சூர்யா-பாலா கூட்டணியில் உருவாகும் சூர்யா41 திரைப்படம். இதன் முதல் கட்ட படப்பிடிப்பு முடிந்த நிலையில் அடுத்த கட்ட படப்பிடிப்பு விரைவில் துவங்கவுள்ளது. இத்தகவலை அதிகாரப்பூர்வமாக நடிகர் சூர்யா தன் சமூகவலைதள பக்கத்தில் பகிர்ந்துள்ளார்.
சூர்யா-பாலா கூட்டணியில் உருவான ‘நந்தா, பிதாமகன்’ என இரு படங்களும் பிளாக்பஸ்டர் வெற்றியை குவித்ததுடன், உலக அளவில் பெரும் பாராட்டுக்களையும் பெற்றது. 19 ஆண்டுகளுக்கு பிறகு இந்த கூட்டணி மீண்டும் இணைந்ததில் எதிர்பார்ப்பு அதிகரித்தது. சமீபத்தில் இப்படத்தின் படப்பிடிப்பு கன்னியாகுமரியில் துவங்கி பரபரப்பாக நடந்து வந்த நிலையில், இப்படம் நிறுத்தப்படுவதாக சில தவறான தகவல்கள் இணையத்தில் பரவ ஆரம்பித்தது.
இந்நிலையில் வதந்திகள் அனைத்தையும் பொய்யாக்கும் விதமாக நடிகர் சூர்யா இப்படத்தின் அடுத்த கட்ட படப்பிடிப்பு விரைவில் துவங்கவுள்ளதாக தன் சமூக வலைதள பக்கத்தில் அறிவித்துள்ளார். முதல் கட்ட படப்பிடிப்பு முடிவடைந்த நிலையில் இரண்டாம் கட்ட படப்பிடிப்பு, சிறு இடைவேளைக்கு பிறகு, விரைவில் துவங்குமென படக்குழு தெரிவித்துள்ளதைத் தொடர்ந்து வதந்தி செயலற்றுப் போயிருக்கிறது.
படத்தில் முற்றிலும் மாறுபட்ட வேடத்தில் சூர்யா நடிக்க, டோலிவுட்டின் டாப் ஹீரோயின் கிரித்தி ஷெட்டி நாயகியாக நடிக்கிறார். இன்னொரு முக்கிய கதாபாத்திரத்தில் அறிமுகமாகிறார் மமிதா.
இப்படத்தின் ஒளிப்பதிவை பாலசுப்பிரமணியெம் மேற்கொள்ள, இசையமைக்கிறார் ஜி. வி. பிரகாஷ். கலை இயக்குநர் மாயப்பாண்டி. எடிட்டர் சதீஷ் சூர்யா. இந்தப் படத்தை 2டி என்டர்டயின்மென்ட் சார்பில் ஜோதிகா மற்றும் சூர்யா தயாரிக்க, ராஜசேகர் கற்பூரசுந்தர பாண்டியன் இணைந்து தயாரிக்கிறார்.