ராகவா லாரன்ஸ் நடிக்கும் ‘சந்திரமுகி-2′ படத்தின் வெளியிட்டு தேதி அறிவிப்பு விநாயகர் சதுர்த்தியன்று வெளியாகிறது
லைக்கா புரொடக்ஷன்ஸ் சார்பில் தயாரிப்பாளர் சுபாஷ்கரன் தயாரிப்பில் ராகவா லாரன்ஸ் நாயகனாக நடித்திருக்கும் ‘சந்திரமுகி 2′ படத்தின் வெளியீட்டு தேதி அறிவிக்கப்பட்டிருக்கிறது.
இயக்குநர் பி.வாசு இயக்கத்தில் 65-வது படமாக தயாராகி இருக்கும் திரைப்படம் ‘சந்திரமுகி 2′. இதில் ராகவா லாரன்ஸ், கங்கனா ரனாவத், ‘வைகைப்புயல்’ வடிவேலு, ராதிகா சரத்குமார், ராவ் ரமேஷ், ஒய். ஜி. மகேந்திரன், ரவி மரியா, சுரேஷ் மேனன், விக்னேஷ், சாய் அய்யப்பன், சத்ரு, டி.எம்.கார்த்திக், மகிமா நம்பியார், லட்சுமி மேனன், சிருஷ்டி டாங்கே, சுபிக்ஷா கிருஷ்ணன் உள்ளிட்ட பலர் நடித்திருக்கிறார்கள். ஆர். டி. ராஜசேகர் ஒளிப்பதிவு செய்திருக்கும் இந்த திரைப்படத்திற்கு ஆஸ்கார் விருது வென்ற இசையமைப்பாளர் எம். எம். கீரவாணி இசையமைத்திருக்கிறார்.
ஹாரர் திரில்லர் வித் ஆக்சன் என்டர்டெய்னராக தயாராகி இருக்கும் இந்த திரைப்படத்தை ஜி.கே. எம். தமிழ்குமரன் தலைமை வகிக்கும் லைக்கா புரொடக்ஷன்ஸ் பிரம்மாண்டமான பொருட்செலவில் தயாரித்திருக்கிறது.
இப்படத்தின் படப்பிடிப்பு அண்மையில் நிறைவடைந்து, இறுதி கட்டப் பணிகள் விறுவிறுப்பாக நடைபெற்று வருகிறது. இந்நிலையில் படம் விநாயகர் சதுர்த்தியன்று தமிழில் மட்டுமல்லாமல் தெலுங்கு, மலையாளம், கன்னடம், இந்தி ஆகிய இந்திய மொழிகளில் வெளியாகும் என அதிகாரப்பூர்வமாக அறிவிக்கப்பட்டிருக்கிறது.
இதனிடையே ரஜினி நடிப்பில் பி.வாசு இயக்கத்தில் வெளியாகி மாபெரும் வெற்றி பெற்ற ‘சந்திரமுகி’ படத்தின் இரண்டாம் பாகமாக தயாராகியிருக்கும் இந்த ‘சந்திரமுகி 2’ படத்திற்கும், பார்வையாளர்களிடையே பெரும் எதிர்பார்ப்பு ஏற்பட்டிருக்கிறது என்பது குறிப்பிடத்தக்கது.