டென் அவர்ஸ் – திரை விமர்சனம்

கள்ளக்குறிச்சி அருகே இளம்பெண் ஒருவர் காணாமல் போனதாக அவரது பெற்றோர் புகார் தர… புகாரின் பேரில் விசாரணையை தொடங்கும் போலீஸ் இன்ஸ்பெக்டர் சிபி ராஜுக்கு அந்தப் பெண் திட்டம் போட்டு கடத்தப் பட்டது தெரிய வர…
சபரிமலைக்கு மாலை போட்டு இருந்த சிபி மறுநாள் சபரிமலைக்கு பயணம் மேற்கொள்ள வேண்டும். இந்த கடத்தல் கேஸை கையில் எடுத்தவருக்கு இடையில் இருப்பது பத்து மணி நேரம் மட்டுமே. அந்த 10 மணி நேரத்திற்குள் கடத்தப்பட்ட பெண்ணை மீட்க வியூகம் அமைத்தவருக்கு கூடுதலாக இன்னொரு கேசும் சவாலாக அமைகிறது. சென்னையில் இருந்து கோவை நோக்கி செல்லும் ஆம்னி பேருந்து ஒன்றில் பெண் ஒருவர் தாக்கப்படுவதாக போனில் தகவல் வர, அந்த பெண்ணையும் மீட்டெடுக்க வேண்டிய கட்டாயம் நேர்கிறது. இதனால், அந்த பேருந்தை தடுத்து நிறுத்தி சோதனை செய்யும் போது, புகார் அளித்த இளைஞர் கொலை செய்யப்பட்டு கிடக்கிறார்.

பெண் கடத்தல்,, பேருந்தில் இளைஞர் கொலை, என இரண்டு வழக்குகளையும் பத்து மணி நேரத்தில் முடித்து சிபி சத்யராஜ் சபரிமலை சென்றாரா என்பது திகுதிகு விறு விறு திரைக்கதை.போலீஸ் இன்ஸ்பெக்டராக சிபி சத்யராஜ், காக்கி
உடைக்கு நடிப்பில் கம்பீரம் சேர்க்கிறார். எதிரிகளை கண்டுபிடிக்க அவர் காட்டும் முனைப்பும் வேகமும் காக்கி
உடைக்கான கம்பீரம். அடிதடியிலும் ஆக்ஷன் தெறிக்கிறது.

போலீஸ் சப்-இன்ஸ்பெக்டராக கஜராஜ், மருத்துவராக ஜீவா ரவி பொருத்தமான பாத்திரங்களில் பளபளக்கிறார்கள். பேருந்தில் கொலை செய்யப்படும் இளைஞராக ராஜ் ஐயப்பன், பஸ் கண்டக்டராக .முருகதாஸ், வில்லனாக திலீபன் விறுவிறுப்பான கதையோட்டத்துக்கு உதவுகிறார்கள்.

இரவு நேரக் காட்சிகளை மிக நேர்த்தியாக நமக்குள் கடத்துகிறது ஒளிப்பதிவாளர் ஜெய் கார்த்திக்கின் கேமரா. கே.எஸ்.சுந்தரமூர்த்தியின் பின்னணி இசை படத்தின் பரபரப்போடு இணைந்த அழகுக் கலவை. கடத்தப்பட்ட இளம் பெண்ணுக்கும் பஸ்ஸில் தாக்கப்பட்ட பெண்ணுக்குமான திரைக்கதை இணைப்பு கிளைமாக்சை இன்னும் பரபரப்பாக்கி விடுகிறது.எழுதி இயக்கி இருக்கும் இளையராஜா கலியபெருமாள், ஒரு கடத்தல் கதையை கையாண்ட விதத்தில் சுலபமாக நம் மனதுக்குள் இடப்பெயர்ச்சி செய்து விடுகிறார்.

திரில்லர் எக்ஸ்பிரஸ்.