எனக்கு என்டே கிடையாது.. சினிமா விமர்சனம்

விக்ரம் ரமேஷ் இயக்கி கதையின் நாயகனாக நடித்துள்ளார். இவருடன் இப்பட தயாரிப்பாளரான கார்த்திக் வெங்கட்ராமனும் நடித்துள்ளார்.

நாயகியாக ஸ்வயம் சித்தா, சிவகுமார் ராஜு, முரளி சீனிவாசன், சக்திவேல் உள்ளிட்டோரும் நடித்துள்ளனர்.

கதையின் நாயகி ஸ்வயம் சித்தா இரவு பார்ட்டியை முடித்துவிட்டு வெளியே வருகிறார். வீட்டுக்கு செல்வதற்காக கார் ஒன்றை புக்கிங் செய்கிறார்.

வீட்டிற்கு செல்லும் வழியில் டிரைவருடன் பேசி நட்பாக பழகி வீட்டிற்கு வந்து சரக்கடிக்க சொல்கிறார். அப்போது நாயகன் விக்ரம் ரமேஷ் தயங்கவே வீட்டில் யாரும் இல்லை வாருங்கள் என அழைக்கிறார்.

வீட்டில் தனிமை.. போதை இரண்டும் கலக்கவே உடலுறவு கொள்கின்றனர். காலையில் எழுந்து பார்க்கும் போது இறந்து கிடக்கிறார் நாயகி.

என்ன செய்வதென்று புரியாமல் தவிக்கும் நிலையில் அங்கே ஒரு திருடனும் வந்திருக்கிறான். இருவரும் ஏதாவது செய்து தப்பி செல்ல நினைக்கையில் நாயகியை காண அரசியல்வாதி ஒருவரும் வருகிறார். இந்த மூவரும் வீட்டில் சிக்கிக் கொள்கின்றனர்.

வீட்டிற்கு சாவி ஏதும் இல்லாத நிலையில் பாஸ்வேர்டு மட்டுமே கதவைத் திறக்க இருக்கும் நிலையில் திடீரென லாக் ஆகிவிடுகிறது. அதன் பிறகு என்ன நடந்தது? கொலைக்காரன் யார்? கதவு அன்லாக் செய்யப்பட்டதா? என்பதுதான் மீதிக்கதை.

ஒரே அறை.. மொத்தம் 5-6 நட்சத்திரங்கள் என்று சிறிய பட்ஜெட்டில் தரமான படத்தை கொடுத்துள்ளார் இயக்குனர் விக்ரம் ரமேஷ். இவரே இயக்குனர் இவரே நாயகன் என்பதால் இரண்டு பொறுப்புகளையும் உணர்ந்து அதற்கு ஏற்ப கதைக்களம் அமைத்து சுவாரஸ்யம் கூட்டி இருக்கிறார்.

நாயகிக்கு முதல் 20 நிமிடங்கள் மட்டும்தான். அதிலும் கொஞ்சம் இளசுகளை சூடேற்றி செல்கிறார்.

அதன் பின்னர் இந்தப் படத்தில் நடித்துள்ள விக்ரம் ரமேஷ், கார்த்திக் & சிவக்குமார் ஆகிய மூவருமே சிறப்பான நடிப்பை வெளிப்படுத்தி உள்ளனர்.

போதை.. கலக்கம்.. பதட்டம்.. உற்சாகம் என அனைத்தையும் சிறப்பாகவே வெளிப்படுத்தியுள்ளனர். இவர்களுக்கு இதுதான் முதல் படம் என்று இவர்களே சொன்னாலும் நம்மால் நம்ப முடியாது.

வெறுமனே திரைக்கதையில் மட்டும் கவனம் செலுத்தாமல் இடையிடையே வந்து செல்லும் டைட்டில் கார்டுகளும் ரசிக்க வைக்கிறது. இன்டர்வெல் என்பது கூட இன்டர்வலோ என போதையில் சொல்லும் வார்த்தைகளை போலவே பதிவிடுகின்றனர்.

அது போல நாயகன் – நாயகி உடலுறவு கொள்ளும் போது அவர்கள் செய்யும் விபரீத விளையாட்டை முயற்சிக்காதீர்கள் எனவும் டைட்டில் கார்டு போடப்படுகிறது. இப்படியாக சுவாரசியம் கொடுத்து திரைக்கதையை நம்முடன் ஒன்ற வைக்கிறார்.

தளபதி ரத்னம் ஒளிப்பதிவு செய்துள்ளார். கலாச்சரண் இசையமைத்துள்ளார். பதட்டம் துள்ளல் ஆகிய சூழ்நிலை ஏற்ப இசை வடிவத்தை கொடுத்துள்ளார்.

ஒளிப்பதிவாளரின் கைவண்ணமும் பாராட்டுக்குரியது. ஒரே வீட்டில் ஒரே அறை திரும்பத் திரும்பக் காட்டப்பட்டாலும் அவர் கொடுத்துள்ள லைட்டிங் கேமரா ஆங்கிள் அனைத்தும் வேற லெவல்.

எனக்கு எண்டே கிடையாது படத்தை ரசித்து கொண்டாடலாம். இந்த படத்திற்கு பார்ட் 2 வந்தாலும் ஆச்சரியம் இல்லை.

பெரிய நட்சத்திரங்களை நம்பாமல் இந்த படத்தை பார்த்து இவர்கள் மீது நம்பிக்கை வைத்து ஆக்ஷன் ரியாக்ஷன் ஜெனிஸ் என்பவர் வெளியிடுகிறார்.

நட்சத்திரங்களுக்கு கை கொடுக்கும் ஜெனிசுக்கும் நாம் மரக்கன்று கொடுத்தும் பாராட்டலாம்.

ஹங்க்ரி வுல்ஃப் என்டர்டெயின்மென்ட் நிறுவனம் சார்பில் கார்த்திக் வெங்கட்ராமன் தயாரித்துள்ளார்.

ஆக… எனக்கு என்டே கிடையாது.. நல்ல கதைக்கு தோல்வியே கிடையாது